མང་ཚོགས་ཀྱི་ཁེ་ཕན་ནི་དོན་ཆུང་མིན།

ཀྲུང་གོའི་བོད་ཀྱི་གསར་འགྱུར་དྲ་བ།

| 2015-10-10 10:12:43

“དེ་ནི་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་བྱམས་བརྩེའི་ངང་མཇལ་འཕྲད་གནང་ཐེངས་གཉིས་པ་ཡིན”ཞེས་ཟླ་10ཚེས་5ཉིན་གྱི་ཕྱི་དྲོ་རང་ལྗོངས་ཀྱི་གཞི་རིམ་གྱི་མི་རིགས་མཐུན་སྒྲིལ་གྱི་ཕུལ་བྱུང་འཐུས་མི་ལྷ་ས་གྲོང་ཁྱེར་ཁྲེང་ཀོན་ཆུས་རྔ་ཆེན་ཤང་དར་དམར་གྲོང་ཚོའི་ཏང་ཀྲི་པུའི་ཧྲུའུ་ཅི་སྐལ་བཟང་སྒྲོལ་དཀར་གྱིས་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བཤད་བྱུང་། སྐལ་བཟང་སྒྲོལ་དཀར་གྱིས་ཟླ་9ཚེས་30ཉིན་གྱི་ཕྱི་དྲོ་ནང་སོག་དང་། ཀོང་ཤིས། བོད་ལྗོངས། ཉིང་ཞ། ཤིན་ཅང་བཅས་རང་སྐྱོང་ལྗོངས་ལྔའི་གཞི་རིམ་གྱི་འཐུས་མི་13ལ་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མཇལ་འཕྲད་གནང་སྐབས་ཚང་མ་སེམས་འགུལ་ཆེན་པོ་ཐེབས་ནས་གཅིག་རྗེས་གཉིས་མཐུད་ངང་གང་བསམ་ལྷུག་པོར་གླེང་། དེ་ནི་ཚོགས་འདུ་འཚོགས་པ་འདྲ་པོ་མེད་པར་ཅི་འཕྲོས་མོལ་འཕྲོས་བྱེད་པ་དང་གཉིས་སུ་མེད་ཅེས་བཤད་བྱུང་། སྐལ་བཟང་སྒྲོལ་དཀར་གྱིས“ཉེ་བའི་ལོ་ཤས་རིང་ང་ཚོ་དར་དམར་གྲོང་ཚོའི་སྤྱི་ཚོགས་དུས་བབ་བརྟན་ལྷིང་ཡིན་པས་ཉེས་དོན་གྱོད་གཞི་གཅིག་ཀྱང་ལྷག་མེད་པ་དང་། ཁྱིམ་མཚེས་འཆམ་མཐུན་དང་མང་ཚོགས་མཐུན་སྒྲིལ་རོགས་རེས་བྱེད་ཀྱི་ཡོད།

འདི་ལོ་ཚུན་དུ་ང་ཚོའི་གྲོང་ཚོའི་དུད་ཚང་900ལྷག་ཙམ་གྱི་གྲོང་མི་ཚང་མ་ཁང་པ་གསར་པར་སྤོས་པ་དང་སྤྱི་ཚོགས་འགན་སྲུང་མ་ལག་ལེགས་སུ་ཤུགས་ཆེན་ཕྱིན་ཡོད་པས། གྲོང་མི་ཚོས་བདེ་སྐྱིད་ཆེན་པོ་ཡིན་པ་ཚོར་གྱི་ཡོད། སྤྱི་ཁྱབ་ཧྲུའུ་ཅིས་དར་དམར་གྲོང་ཚོའི་གྲོང་མི་བདེ་སྡོད་ལས་བརྩོན་ཡིན་པ་མཁྱེན་སྐབས། དགྱེས་ཚོར་ཆེན་པོ་གནང་ནས་གཞི་རིམ་ནས་སླེབས་པའི་འཐུས་མི་ཚོར་བཀའ་མངགས་གནང་བ་སྟེ། ‘ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་བྱེད་པར་མི་རིགས་གཅིག་ཀྱང་མི་ལུས་པ་བྱེད་དགོས’ ཏང་ཀྲུང་དབྱང་གིས་མི་རིགས་ལས་དོན་དང་དབུལ་སྒྲོལ་ལས་དོན་ལ་མཐོང་ཆེན་གནང་དོན་ནི་དེ་བས་ལེགས་པའི་ངང་མི་རིགས་ས་ཁུལ་གྱི་མཐུན་སྒྲིལ་བརྟན་ལྷིང་ལ་སྲུང་སྐྱོང་དང་། དེ་བས་ལེགས་པའི་ངང་མི་རིགས་ས་ཁུལ་འཕེལ་རྒྱས་མགྱོགས་པོ་ཡོང་བ། དེ་བས་ལེགས་པའི་ངང་མི་རིགས་ཁག་གི་བློ་གྲོས་དང་སྟོབས་ཤུགས་གཅིག་འགྲིལ་ཡོང་བ་བཅས་བྱས་ནས་མི་རིགས་ཁག་མཉམ་དུ་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱ་ཆེད་རེད་ཅེས་གསུངས་བྱུང”ཞེས་གསར་འགོད་པར་བཤད། “སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་བྱམས་བརྩེའི་བཀའ་མངགས་ཉན་རྗེས་2020ལོར་སླེབས་སྐབས་དར་དམར་གྲོང་ཚོ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་བྱེད་པའི་ངའི་དམིགས་ཚད་སྔར་བས་བརྟན་དུ་ཕྱིན་སོང”ཞེས་སྐལ་བཟང་སྒྲོལ་དཀར་གྱིས་སེམས་འགུལ་ཆེན་པོ་ཐེབས་བཞིན་དུ་བཤད། ཁོང་གིས“ང་སློབ་གྲྭ་འགྲིམ་མྱོང་མེད་པས་སེམས་འགུལ་ཆེན་པོ་ཐེབས་པའི་མྱོང་བ་དེ་ངག་ནས་ཐོན་ཐབས་མི་འདུག་པས་སྤྱི་ཁྱབ་ཧྲུའུ་ཅིའི་བཀའ་མངགས་ཆུད་ཟོས་སུ་གཏན་ནས་གཏོང་གི་མིན། ཏང་དང་སྲིད་གཞུང་གིས་ང་ཚོ་བོད་ཀྱི་མི་རིགས་ཁག་གི་མང་ཚོགས་ལ་བྱམས་བརྩེའི་ཐུགས་ཁུར་གནང་བ་དེ་དག་བྱ་སྤྱོད་དངོས་སུ་དོན་འཁྱོལ་ཐུབ་པ་བྱས་ནས། ‘བོད་ལྗོངས་འདི་ཉིད་མི་རིགས་མཐུན་སྒྲིལ་གྱི་དཔེ་བཟང་ཁུལ་དུ་གཏོད་པའི’དམིགས་ཚད་འགྲུབ་ཆེད་འབད་འཐབ་ཧུར་ཐག་བྱ་རྒྱུ་ཡིན”ཞེས་བཤད།

སྐལ་བཟང་སྒྲོལ་དཀར་གྱིས་དར་དམར་གྲོང་ཚོ་ཨུ་ལྷན་དུ་ལས་ཀ་བྱས་ནས་ལོ་36ཙམ་འགྲོ་གི་ཡོད་པ་དང་གཞི་རིམ་ལས་ཀའི་ཉམས་མྱོང་མང་པོ་ཞིག་བསགས་ཡོད་མོད། འོན་ཀྱང་ཁོང་གིས་གསར་འགོད་པར་བརྒྱ་བཤད་སྟོང་བཤད་བྱས་ཀྱང་ཡོས་ལ་འབབ་རྒྱུ་རྩམ་པ་ཇི་བཞིན“གྲོང་ཚོ་ཨུ་ལྷན་ནི་མང་ཚོགས་ལ་ཞབས་འདེགས་ཞུ་མཁན་ཞིག་རེད” དར་དམར་གྲོང་ཚོ་ལྷ་སའི་ཤར་འདབས་སུ་གནས་པ་དང་ས་ཁྱོན་ཆེན་པོ་ཡོད། གྲོང་ཚོར་མི་རིགས་མཐུན་སྒྲིལ་གྱི་ཁྱིམ་ཚང་མང་པོ་ཡོད་ལ་གྲོང་ཚོའི་ཕྱི་རོལ་ཏུ་ལྗོངས་ཕྱིའི་མི་རིགས་ཁག་གི་མང་ཚོགས་དེ་གར་ཨར་ལས་བྱེད་མཁན་ཡོད་ཅེས་བཤད།

ལོ་ཤས་གོང་ཧོ་ནན་ནས་འདི་གར་ཨར་པོ་རྒྱུག་པར་སླེབས་པའི་བུད་མེད་ཅིག་གིས་ཕྲུ་གུ་གཉིས་ཁྲིད་དེ་གྲོང་ཚོ་ཨུ་ལྷན་དུ་བཟའ་ཟླ་འཆི་བའི་ངོ་སྤྲོད་ཡི་གེ་ཞིག་འབྲི་རྒྱུའི་རེ་བ་འདོན་པར་སླེབས། སྐལ་བཟང་སྒྲོལ་དཀར་གྱིས་བུད་མེད་དེས་པུར་སྲེག་ཁང་གང་དུ་ཡོད་མེད་མ་ཤེས་པ་མཐོང་དུས། གྲོང་ཚོ་ཨུ་ལྷན་གྱི་ལས་བྱེད་པ་དང་ཆེད་གཏོང་རླངས་འཁོར་ཞིག་བཀོད་སྒྲིག་བྱས་ནས་བུད་མེད་དེའི་བཟའ་ཟླའི་རྗེས་མཇུག་ཚང་མ་སྒྲུབ་རོགས་བྱས། ཡུན་རིང་ནང་མི་རིགས་མཐུན་སྒྲིལ་གྱི་དཔེ་མཚོན་ཡིན་པའི་འཐུས་མི་སྐལ་བཟང་སྒྲོལ་དཀར་གྱིས་རང་དཔེ་གཞན་སྟོན་ངང་སྣེ་ཁྲིད་བྱས་པས་དར་དམར་གྲོང་ཚོའི་ཕྱོགས་གང་སར་སྤྱི་ཚོགས་ཞི་མཐུན་མཉམ་གནས་དང་དཔལ་འབྱོར་དབྱར་མཚོ་རྒྱས་པ་བཞིན་འཕེལ་རྒྱས་ཕྱིན་པའི་རྣམ་པ་ཞིག་མཐོང་རྒྱུ་ཡོད། སྐལ་བཟང་སྒྲོལ་དཀར་གྱིས་མང་ཚོགས་ཀྱི་ཁེ་ཕན་དོན་ཆུང་མིན་པས་སླད་ཕྱིན་ལས་དོན་ཁྲོད་གྲོང་ཚོ་ཨུ་ལྷན་གྱིས་མང་ཚོགས་ལ་ཞབས་འདེགས་ཞུ་བའི་དམིགས་ཡུལ་དེ་མུ་མཐུད་རྒྱུན་འཁྱོངས་བྱེད་དགོས་ཞེས་བཤད།

རྒྱལ་ཁབ་ཀྱི་རླུང་ཁམས་ཆེ་མོ

གནམ་མཚོའི་

བརྙན་མཐོང་།